Tambok

“Tambok”

Ako tawo lamang nga sama sa inyo,

Naa ko’y kasing-kasing, kalag, og Ginoo

Apan ngano man nga ang uban sa inyo

Mahilig gyud nga painiton ang akong ulo?

Kung maglakaw gani ko sa kadalanan,

Ang mangatawa pastilang pagkadaghan,

Ang uban kay mag-uyog-uyog samtang galantaw

Og moingon dayon, “Linog! Naay tambok galakaw!”

Kung moadto gani ko sa kumbira,

Sa ako galantaw tanang mga mata

Bantayan ang pagkaon nga akong kuhaon

Kung mahurot ba gyud nako sa usa ka lamon.

Ingon-ana na ba gyud ko kahakog?

Pasanginlan nga sa kusina matulog!

Masuko gani ko, sumbagon ko kamo tanan,

Didto gyud mo puniton sa pantalan!

Baboy daw ko, ingon ang uban.

Dako ba diay ang akong dalunggan?

Duha ra ka tiil ang akong gamit kung molakaw

Mga buluyagon! Dili ko mokaon og pasaw!

Ayaw na ko ninyo hagita og lumba’g dagan

Kabalo ba mo kung unsay buhaton kung ako makuyapan?

Tinuod man, dako lagi ko og lawas

Palihug, ayaw lang ko tawga nga aliwas…

Ang pagpangita og sanina lisod kaayo

Kung naa gani kasaigo, mahal pod kaayo

Ang akong mga pantalon kay sa mananahi man gikan

Pero kataw-an pod lagi ko samtang gisukdan.

Pero ang pagkatambok nindot man gihapon

Nagpasabot lang na nga daghan kog pagkaon

Mura daw ko og teddy bear, cute daw ko,

Mao nang daghang girls ang ganahan mogakus sa ako.